သခင်ယေရှု - တမန်တော် အီစာ အလိုင်ဟစ္စလာမ် - ʿĪsā al-Masīḥ ' ကမ္ဘာမြေသို့ ပြန်လည်သက်ဆင်းလာခြင်း

 သခင်ယေရှု - တမန်တော် အီစာ အလိုင်ဟစ္စလာမ် - ʿĪsā al-Masīḥ ' ကမ္ဘာမြေသို့  ပြန်လည်သက်ဆင်းလာခြင်း။

အစ္စလာမ်သာသနာတွင် သခင်ယေရှု (တမန်တော် အီစာ အလိုင်ဟစ္စလာမ် - ʿĪsā al-Masīḥ ကမ္ဘာမြေသို့ ပြန်လည်သက်ဆင်းလာမည့် အယူအဆသည် အလွန်အရေးကြီးသော ယုံကြည်ချက်တစ်ခု ဖြစ်သည်။ ကျမ်းမြတ်ကုရ်အာန် စူရဟ် အန္နိစာအ် အာယသ်တော် ၁၅၇-၁၅၈ တွင် 

"အမှန်စင်စစ် သူတို့သည် သခင်ယေရှု (တမန်တော်အီစာ) ကို မသတ်ခဲ့ကြရချေ၊ ကပ်တိုင်ပေါ်၌လည်း မတင်ခဲ့ကြရချေ။... စင်စစ်သော်ကား အလ္လာဟ်အရှင်မြတ်သည် ထိုသခင်ယေရှု (တမန်တော်အီစာ) ကို မိမိထံတော်သို့ ပင့်ဆောင်တော်မူခဲ့လေသည်။" 

ဟု ပြဆိုထားသည့်အတိုင်း သခင်ယေရှု (တမန်တော်အီစာ) သည် ကပ်တိုင်ပေါ်တွင် အသက်မဆုံးခဲ့ဘဲ ကောင်းကင်ဘုံသို့ ပင့်ဆောင်ခြင်း ခံထားရခြင်း ဖြစ်သည်။ ၎င်းနောက် စူရဟ် အဇ်ဇုခ်ရွဖ် အာယသ်တော် ၆၁ တွင် 

"ပြီးနောက် စင်စစ်ဧကန် ထိုသခင်ယေရှု (တမန်တော်အီစာ) သက်ဆင်းလာခြင်းသည် လောကပျက်မည့်နေ့ (ကေယာမတ်) ၏ အမှတ်လက္ခဏာတစ်ရပ် ဖြစ်ပေသည်။ သို့ဖြစ်ပေရာ သင်တို့သည် ထိုနေ့နှင့်ပတ်သက်၍ လုံးဝမသံသယမရှိကြကုန်လင့်။" 

ဟု မိန့်တော်မူကာ လောကကြီး မပျက်စီးမီ နောက်ဆုံးကာလတွင် ၎င်းပြန်လည်သက်ဆင်းလာမည့်အကြောင်းကို အထင်အရှား သက်သေပြထားသည်။ ထို့ပြင် စူရဟ် အန္နိစာအ် အာယသ်တော် ၁၅၉ အရ သခင်ယေရှု (တမန်တော်အီစာ) ကမ္ဘာမြေသို့ ပြန်လည်ရောက်ရှိလာချိန်တွင် ကွယ်လွန်ခြင်းမပြုမီ ကျမ်းဂန်ရရှိသူ ခရစ်ယာန်နှင့် ဂျူးဘာသာဝင်အားလုံးက ၎င်းကို ဧကန်မုချ သဘောပေါက်နားလည်ပြီး ယုံကြည်ကြမည် ဖြစ်သည်။

ဆွဟီးဟ် မွတ်စလင်ကျမ်းလာ ဟဒီးစ်တော်များအရ သခင်ယေရှု (တမန်တော်အီစာ) သည် ကောင်းကင်တမန်နှစ်ပါး၏ အတောင်ပံများပေါ်တွင် လက်နှစ်ဖက်တင်လျက်၊ အဝါရောင်ဝတ်စုံနှစ်ထည်ကို ဝတ်ဆင်ကာ ဆီးရီးယားနိုင်ငံ ဒမာတ်စကတ်မြို့ အရှေ့ဘက်ရှိ လူဖြူမင်နာရတ်မျှော်စင်အနီးသို့ သက်ဆင်းလာမည် ဖြစ်သည်။ ၎င်းပြန်လည်ကျွန်းမြန်းလာရခြင်း၏ အဓိကရည်ရွယ်ချက်မှာ ကမ္ဘာကြီးကို လှည့်စားဖျက်ဆီးမည့် သာသနာဖျက် ဒဂ်ဂျာလ် (Anti-Christ) ကို နှိမ်နင်းသတ်ဖြတ်ရန်၊ မိမိသည် ဘုရားသခင်မဟုတ်ကြောင်းနှင့် ကပ်တိုင်တင်ခံရခြင်းမရှိကြောင်း အမှန်တရားကို ထင်ရှားစေရန်၊ စစ်မက်များကို ချုပ်ငြိမ်းစေကာ ကမ္ဘာမြေပေါ်တွင် ငြိမ်းချမ်းရေးနှင့် သာယာဝပြောမှုကို ဖော်ဆောင်ရန် ဖြစ်သည်။ သခင်ယေရှု (တမန်တော်အီစာ) သည် ကမ္ဘာမြေပေါ်တွင် ၄၀ နှစ်တိုင် တရားမျှတစွာ အုပ်ချုပ်စိုးစံပြီးနောက် လူသားတစ်ဦးအနေဖြင့် သေခြင်းတရားကို မြည်းစမ်းကာ ကွယ်လွန်သွားမည်ဖြစ်ပြီး မွတ်စလင်များက စနစ်တကျ သင်္ဂြိုဟ်ပေးကြမည် ဖြစ်သည်။

ဤသို့ ပြန်လည်သက်ဆင်းလာခြင်းသည် သာသနာအသစ် သို့မဟုတ် အီဗရာဟင် သာသနာသစ်တစ်ခုခုကို ယူဆောင်လာခြင်း မဟုတ်ပါ။ အဘယ်ကြောင့်ဆိုသော် ကုရ်အာန်ကျမ်းမြတ် စူရဟ် အာလေအင်မရ်န် အာယသ်တော် ၆၇ တွင် 

"အီဗရာဟင်သည် ဂျူးတစ်ဦးလည်း မဟုတ်ခဲ့ချေ၊ ခရစ်ယာန်တစ်ဦးလည်း မဟုတ်ခဲ့ချေ။ သို့ရာတွင် သူသည် စိတ်ရင်းမှန်ဖြင့် အလ္လာဟ်အရှင်မြတ်ဘက်သို့ လှည့်ခဲ့သူ (မွတ်စလင်) တစ်ဦးသာ ဖြစ်ခဲ့၏။" 

ဟု ဖော်ပြထားရာ အီဗရာဟင်၏ လမ်းစဉ်သည်လည်း အစ္စလာမ်သာသနာသာ ဖြစ်သည်။ ထို့ပြင် စူရဟ် အလ်အဟ်ဇာဗ် အာယသ်တော် ၄၀ တွင် တမန်တော်မြတ် မုဟမ္မဒ် (ဆွ) ကို နောက်ဆုံးပိတ်တမန်တော်အဖြစ် သတ်မှတ်ထားပြီးဖြစ်၍ သာသနာသစ် ထွက်ပေါ်လာစရာ အကြောင်းမရှိပေ။ သခင်ယေရှု (တမန်တော်အီစာ) သည် ယခင်ကတည်းက တမန်တော်ဖြစ်နှင့်ပြီးသား ဖြစ်သဖြင့် တမန်တော်အသစ်အဖြစ် လာခြင်းမဟုတ်ဘဲ ကျမ်းမြတ်ကုရ်အာန်နှင့် နောက်ဆုံးတမန်တော်၏ လမ်းစဉ်အတိုင်းသာ လောကကြီးကို အုပ်ချုပ်မည် ဖြစ်သည်။ ၎င်းနှင့်ပတ်သက်၍ တမန်တော်မြတ် မုဟမ္မဒ် (ဆွ) က မိန့်တော်မူခဲ့သည် - 

"သင်တို့၏ ခေါင်းဆောင် (အီမာမ်) သည် သင်တို့ထဲမှဖြစ်ပြီး၊ မာရ်ယမ်၏သားတော် (သခင်ယေရှု/တမန်တော်အီစာ) သည် သင်တို့ထံသို့ သက်ဆင်းလာကာ သင်တို့အကြား၌ (ကုရ်အာန်နှင့် ဟဒီးစ်တော်အတိုင်း) တရားစီရင်မည့်အခါ သင်တို့သည် မည်သို့ရှိကြမည်နည်း။"

 (Sahih al-Bukhari 3449, Sahih Muslim 156)