ကွမ်းယာ ဋိကာ

ကွမ်းယာ ဋိကာ
--------------

တောင်အာရှနှင့် အရှေ့တောင်အာရှနိုင်ငံများ၏ ရိုးရာယဉ်ကျေးမှုနယ်ပယ်တွင် ဧည့်ခံကျွေးမွေးတတ်သော ပါးစပ်အာသာပြေစရာ တစ်ရပ်အနေဖြင့် ကွမ်းယာသည် မိမိတို့သိုင်းဝိုင်းသမိုင်းကြောင်းတွင် အခိုင်အမာ နေရာယူခဲ့ပေသည်။
ကွမ်းရွက်၊ ထုံး၊ ရှားစေး၊ ကွမ်းသီးခြောက် ၊ ကွမ်းသီးစိမ်း ၊ ကွမ်းသီးပြုတ်၊ စမုံစပါး၊ ဖာလာ၊ နွယ်ချို၊ ဇဝက်သာ၊ ပျဉ်းတော်သိမ်၊ စမုံဖြူ၊ စမုံနက်၊ မကျည်းမှည့် သကြားလုံးမှုန့်၊ နှင်းဆီပွင့်ယို၊ ပျားရည်၊ အုံးသီး၊ ဂုန်ခါး၊ အုန်းသီးကြော်၊ မြေပဲဆံ၊ နွယ်ချို၊ သံပရာသီးစိတ်၊ ကာဒမင်၊ ကြက်သွန်ဖြူ၊ ဇီရာ၊ ဂျင်း၊ နံ့သာအမြစ်များ၊ ပန်းသစ်ဂျပိုး၊ လေးညှင်းပွင့်၊ ဖာလာ၊ သစ်ကြံပိုးခေါက်၊ ကွမ်းပေါင်းဆေး၊ ဆေးမဲ၊ ဇာဖရာန် တို့အပြင် အရပ်ဒေသနှင့် အသက်အရွယ်ပေါ်မူတည်၍ ဆေးရွက်ကြီး၊ ၉၂၊ ဆေးမွှေး ၊ ဘုရင်မ စသည်တို့ကို ထည့်သွင်းကာ ရွှေမှုံ၊ ငွေမှုံများကပ်၍ အလှဆင်ဝါး၊ ထွေးလေ့ရှိကြသည်။
ရှေးခေတ် မင်းစိုးရာဇာ ထီးသုံး၊ နန်းသုံး၊ နတ်ဆက်၊ ဦးရှင်ကြီးတင်၊ အုံးစွဲ၊ နတ်ကနားပွဲ၊ ကန်တော့ပွဲ၊ အလှူမင်္ဂလာပွဲ၊ သင်္ဂြိုဟ်ပွဲများ၊ အထက်လမ်း၊ အောက်လမ်း၊ နှစ်ကူး၊ ရေနွေးကြမ်းဝိုင်း၊ ဘောလုံးပွဲ၊ ဖဲဝိုင်း၊ ကြက်ဝိုင်း၊ ဂျင်ဝိုင်း၊ စျေးဝိုင်းနှင့် နွားဝိုင်းအဆုံး အရပ်ထဲက ကွမ်ယာဆိုင်၊ ဧည့်ခံကွမ်းအစ်များအထိ မိမိတို့ အသိုက်အမြုံများတွင် အစဥ်အဆက် သုံးစွဲလာခဲ့ကြသည့် ယဉ်ကျေးမှုအမွေအနှစ်တစ်ခုလည်း ဖြစ်ပေသည်။
သို့ရာတွင် ယနေ့ခေတ် ဆေးပညာအမြင်ဖြင့် စူးစမ်းသုံးသပ်ကြည့်မည်ဆိုပါက ဤရိုးရာအလေ့အထ၏ နောက်ကွယ်တွင် ကျန်းမာရေးကို ထိခိုက်စေခြင်း (Harmful to Health) ကဲ့သို့သော ဆိုးကျိုးများစွာ ရှိနေသည်ကို တွေ့ရပေမည်။ ကွမ်းသီး၏ မာကျောမှု၊ ကွမ်းသီးနှင့် ဆေးရွက်ကြီးတို့တွင် ပါဝင်သော ကင်ဆာဖြစ်စေနိုင်သည့် အဆိပ်အတောက်များကြောင့် ခံတွင်းကင်ဆာ၊ ခံတွင်းနံရံတင်းမာယိုယွင်းသည့်ရောဂါ (Oral Submucous Fibrosis) အပြင် နှလုံးနှင့် သွေးကြောဆိုင်ရာ ထိခိုက်မှုများကို ဖြစ်ပွားစေနိုင်ကြောင်း ခေတ်မီဆေးပညာက သိပ္ပံနည်းကျ ထောက်ပြထားသည်။
ထို့အပြင် လူမှုရေးအမြင်နှင့် ကိုယ်ကျင့်တရားဆိုင်ရာ ရှုထောင့်များမှ ဆင်ခြင်ကြည့်လျှင်လည်း ပါဝင်ပစ္စည်းများတွင် မူးယစ်စွဲလမ်းစေခြင်း (Addictive/Intoxicating) ဂုဏ်သတ္တိများ ပါရှိနေပြီး၊ နေ့စဉ်စားသုံးမှုအတွက် ငွေကြေး ဖြုန်းတီးခြင်း (Waste of Money) ကိုပါ ဖြစ်ပေါ်စေတတ်ပေသည်။
ထို့အပြင် ဟိုထွေး ဒီထွေး တဗြစ်ဗြစ်လူရှေ့ အမြင်မတင့်တယ်မှုများနှင့် တိုက်လှေကား၊ ဓါတ်လှေကား၊ အများသုံးနေရာများတွင် ကွမ်းတံတွေးပေးနေမှုများသည် ကွမ်းစားသူတိုင်းတွင်တာဝန်ထားရပေမည်။
အထူးသဖြင့် အစ္စလာမ်ဘာသာဝင်တို့၏ ယုံကြည်ကိုးကွယ်မှုနှင့် ကိုယ်ကျင့်တရားဆိုင်ရာ လမ်းညွှန်ချက်များအရ မိမိတို့၏ ခန္ဓာကိုယ်ကျန်းမာရေးကို ထိန်းသိမ်းစောင့်ရှောက်ရန်နှင့် အကျိုးမရှိဘဲ ဆိုးကျိုးသာဖြစ်စေမည့် အရာများကို ရှောင်ကြဉ်ရန် တိုက်တွန်းထားပေသည်။
ကွမ်းယာထဲတွင် ပါဝင်တတ်သော အချို့သော ဆေးမွှေးနှင့် ပစ္စည်းများ ထုတ်လုပ်ရာတွင် အသုံးပြုသည့် အရက်ပြန် (Ethanol) ကဲ့သို့သော အရာများနှင့် အထက်ပါ ဆိုးကျိုးများမှာ အစ္စလာမ်ဘာသာဝင်တို့၏ သန့်ရှင်းစင်ကြယ်သော လူနေမှုစံနှုန်းများနှင့် ကိုက်ညီမှု မရှိလှပေ။
သို့ဖြစ်ပါ၍ ရှေးအစဉ်အလာအရ လက်ဆင့်ကမ်းလာခဲ့ကြသည့် ယဉ်ကျေးမှုဓလေ့များကို တန်ဖိုးထား လေးစားအပ်ပါသော်လည်း၊ ဤကဲ့သို့ စားသုံးခြင်းသည် မိမိ၏ ရုပ်ပိုင်းဆိုင်ရာနှင့် စိတ်ပိုင်းဆိုင်ရာအတွက် အကျိုးမဲ့စေပါကြောင်း သတိပြုဆင်ခြင်သင့်ပေသည်။
ခေတ်ကာလ၏ အသိပညာပေးမှုများ၊ ကျန်းမာရေးဆိုင်ရာ သတိပေးချက်များနှင့် ဘာသာရေးဆိုင်ရာ ထိန်းကျောင်းမှုများကို ခြုံငုံသုံးသပ်ကာ ယဉ်ကျေးမှု အမွေအနှစ်တစ်ခုအနေဖြင့်သာ အကန့်အသက်ဖြင့် ဆင်ခြင်သုံးစွဲသင့်ပါကြောင်း ချစ်ရတဲ့သူငယ်ချင်းများအား စောင်းချိတ်ကလီပြီး တင်စားရေးသားလိုက်ရပေသည်။