ကောင်းကင်သို့ စာပို့ခြင်း ( မူးယစ် ပြန်ထူ )
ကျွန်တော်တို့ သင်တန်းမှာ တစ်လတစ်ကြိမ် လာရောက်သင်ကြားပေးတဲ့ အမျိုးသမီးကြီးတစ်ယောက်ရှိပါတယ်။ သူမက အသားဖြူပြီး Red Indian အယူအဆကို လက်ခံပုံရပါတယ် (ကျွန်တော့်အထင်ပါ)။ သူမ ဝတ်စားတဲ့အခါ ချည်အင်္ကျီအကြမ်း၊ လက်မှာ အရောင်စုံ ကျောက်လက်ကောက်တွေကို ဝတ်ဆင်လေ့ရှိပြီး အသက် ၇၀ လောက် ရှိမယ်ထင်ပါတယ်။ သူမက ယောဂ (Yoga) နှင့် စိတ်တည်ငြိမ်ရေး လေ့ကျင့်ခန်းတွေကို သင်ကြားပေးပါတယ်။
တခါတလေ ခရစ္စမတ် (Christmas) လို အချိန်မျိုးမှာ ကျွန်တော်တို့ ခြေအိတ်လေးတွေကို မိမိကြိုက်နှစ်သက်တဲ့ အဝတ်စနဲ့ လက်နဲ့ချုပ်ပြီး သင်တန်းမှာရှိတဲ့ ခရစ္စမတ်သစ်ပင်အောက်မှာ သွားထားကြရတဲ့ အစီအစဉ်မျိုးလည်း လုပ်ရပါတယ်။
ယောဂနှင့် အသက်ရှူလေ့ကျင့်ခန်းတွေကတော့ မြန်မာတွေနဲ့ ရင်းနှီးပြီးသားဖြစ်လို့ အသေးစိတ် မရှင်းပြတော့ပါဘူး။ ဒါပေမဲ့ ကျွန်တော်တို့ တစ်လတစ်ခါ လုပ်ရတဲ့ အစီအစဉ်တစ်ခုရှိပါတယ်၊ အဲဒါကတော့ "ကောင်းကင်သို့ စာပို့ခြင်း" ဖြစ်ပါတယ်။ လောကမှာ မရှိတော့တဲ့ မိမိချစ်ခင်ရသူတွေဆီ စာပို့ခြင်းပေါ့။ သူမက အပြာနုရောင် စာရွက်ကလေးတွေကို ကျွန်တော်တို့အားလုံးဆီ ဖြန့်ဝေပေးပါတယ်။ ပြီးရင် ၁၅ မိနစ်လောက် မျက်စိမှိတ်ပြီး စိတ်တည်ငြိမ်မှုယူကြရပါတယ်။ အားလုံးအသံတိတ်နေတဲ့အချိန် ညှင်သာတဲ့ ကြေးခွက်ကလေးကို ခေါက်တဲ့အသံကြားရင် ဖြည်းဖြည်းချင်း မျက်စိဖွင့်ပြီး စာရွက်လေးတွေပေါ်မှာ မိမိချစ်ခင်ရသူများထံ စာရေးပြီး ရင်ဖွင့်ကြပါတယ်။ အချို့သူတွေက စာရေးရင်း မျက်ရည်ကျ နှာရှုံ့သံကြားရပေမဲ့ တစ်ယောက်နဲ့တစ်ယောက် မေးမြန်းခြင်း မရှိကြပါဘူး။
နောက်တစ်ခါ ကြေးခွက်ကလေးကို "တုန်" ဟူ၍ တီးသံကြားရင် ကျွန်တော်တို့အားလုံး စာရွက်လေးကို ခေါက်ပြီး သင်တန်းခန်းမအပြင်ဘက်ရှိ မီးလှုံရာနေရာမှာ ဝိုင်းဖွဲ့ကြပါတယ်။ ခေတ္တမျှ မေတ္တာပို့ ပြီးနောက် မိမိတို့စာရွက်ကလေးတွေကို မီးပုံထဲသို့ ထည့်သွင်းလိုက်ပါတယ်။
ထို့နောက် သင်တန်းခန်းမထဲ ပြန်ဝင်ပြီး ကိုယ့်နေရာမှာ ထိုင်ကာ စိတ်တည်ငြိမ်မှုရအောင် နောက်ထပ် ၁၀ မိနစ်ခန့် ဖြည်းညှင်းစွာ ရှူသွင်း-ရှူထုတ် လုပ်ရင်း စိတ်ကျေနပ်မှုကို ရယူရတဲ့ လေ့ကျင့်ခန်းတစ်ခုအကြောင်း အမှတ်တရမျှဝေလိုက်ပါတယ်။ ပုံထဲမှာ ကျွန်တော် မြှားနဲ့ ပြထားတဲ့နေရာက မီးပုံနေရာဖြစ်ပြီး၊ သူ့ဘေးက နောက်ထပ် အဝိုင်းလေးကတော့ လိပ်ကန်ဖြစ်ပါတယ်။
ပုံ / AADAP, Inc. - Therapeutic Community ( TC )
No comments:
Post a Comment