ငယ်သူငယ်ချင်းနှင့် IQ, EQ 

ဒီနေ့ Hometown Cha-Cha-Cha ဆိုတဲ့ ကိုရီးယားရုပ်ရှင်လေး ကြည့်ဖြစ်တယ်။ မင်းသမီးက IQ ကောင်းပြီး၊ မင်းသားက EQ ကောင်းရုံတင်မကဘဲ ကျွန်တော့်လို ချောတယ်။ ဒီရုပ်ရှင်ကားလေး ကြည့်မိရင်း သတိရမိတာလေး မျှဝေချင်ပါတယ်။

ငယ်ငယ်က အလုံ(၆)မှာ သူငယ်တန်းကတည်းက အတူတူတက်လာတဲ့ သူငယ်ချင်းတစ်ယောက်ရှိတယ်။ သူက စာတော်တယ်၊ IQ ကောင်းတယ်။ ကျွန်တော့်ရည်စားစာတွေကို သူ ဒိုင်ခံပြန်ရေးပေးလေ့ရှိတယ်။ အတန်းထဲမှာ အဆင့် ၃ လောက်ရှိပြီး စာသိပ်မကျက်ဘဲကို ရနေတတ်တယ်။ သူ့စိတ်ထဲမှာ ကြိုးစားရင်ရတယ်ဆိုတာ အရိုးစွဲသလို အတ္တလည်းရှိတယ်၊ "ငါလုပ်မှ ငါရမယ်" ဆိုတာမျိုးပေါ့။ ကျွန်တော်က စာတော်လှသည်မဟုတ်ပေမဲ့ အရပ်ရှည်တော့ ငယ်ငယ်ကတည်းက အတန်းခေါင်းဆောင် ဆက်တိုက်ဖြစ်ခဲ့တယ်။ ဆရာ၊ ဆရာမများနှင့် အတန်းသားများကြားမှာလည်း နေတတ်သလို၊ ကျောင်းမှာ ယဉ်ယဉ်ကျေးကျေးဖြင့် ဆရာ၊ ဆရာမများ၊ ကျောင်းအုပ်အထိ ထောက်ပြပြောဆိုတတ်တဲ့စိတ်လည်း ရှိတယ်။ အထက်တန်းရောက်တာနဲ့ နိုင်ငံရေး၊ ကျောင်းသားအရေးတို့တွင် ပါဝင်ခဲ့ပြီး၊ နောက်ပိုင်း နည်းပညာလှုပ်ရှားမှု၊ ဘာသာရေး၊ လူမှုရေးအသင်းများ၊ ကူညီကယ်ဆယ်ရေးလုပ်ငန်းများကို ဦးဆောင်လုပ်ကိုင်ခဲ့ဖူးသည့်အတွက် ကျွန်တော်က EQ ကျွန်တော့်သူငယ်ချင်းထက်သာတယ်လို့ ထင်မိတယ်။

အထက်တန်းမှာတော့ ကျွန်တော်တို့နှစ်ယောက်ပေါင်းပြီး "Grade - 9 အထူးအဆောင်" ဆိုပြီး အထူးသင်ကြားရန်လိုအပ်သူများကို ကျောင်းသားအချင်းချင်း ညအိပ်နေထိုင်ပြီးသင်ကြားပေးရန် ဆရာမကြီးနဲ့ညှိနှိုင်းခဲ့တယ်။ ကျွန်တော်က ဦးဆောင်ပြီး သူက အပြည့်အဝကူညီလို့ အောင်မြင်ခဲ့တယ်။ သမိုင်းမှာ မေ့မရနိုင်လောက်တဲ့ ထ(၆)မှာ အဆောင်ဖွင့်ပြီး သရဲကိစ္စမှအစ ပြဿနာမျိုးစုံ၊ ဟာသမျိုးစုံ ကြုံတွေ့ခဲ့ရသလို အောင်မြင်စွာလည်း ကျော်ဖြတ်နိုင်ခဲ့ကြတာကို အမှတ်ရမိတယ်။ ပြောချင်တာက အခုမှစမှာပါ။ ဘဝကြီးမှာ IQ နှင့် EQ မျှတစွာရှိအောင် လုပ်ရပါတယ်။ မရှိရင်လည်း ရှိအောင် မွေးမြူသင့်ပါတယ်။ IQ နှင့် EQ မှာ အားနည်းချက်၊ အားသာချက်တွေရှိပါတယ်။ ယနေ့ AI ခေတ်ကြီးတွင် IQ ကိုတော့ AI ဖြင့် အစားထိုးလို့ရလာပေမဲ့ EQ ကတော့ အစားထိုးလို့မရသေးပါဘူး။ သို့သော် အခြေခံ IQ မရှိရင်လည်း ထိရောက်စွာ AI သုံးလို့မရပြန်ပါဘူး။ ဒါကြောင့် IQ, EQ ရှိအောင် ကြိုးစားကြပါလို့ ပြောပါရစေ။