မွေးကတည်းက မီလီယံနာ

ဟုတ်ပါတယ်၊ သင်ဟာ မြန်မာလူမျိုးတစ်ဦးဖြစ်ပြီး မြန်မာနိုင်ငံမှာ မွေးဖွားနေထိုင်သူ မှန်ကန်ပါက မွေးကတည်းက မြန်မာငွေ ဘီလီယံနာတစ်ဦးဆိုတာ မမေ့လိုက်ပါနဲ့။ အမှန်ပါပဲ၊ သင်ဟာ မြန်မာငွေ အနည်းဆုံး ၁ ဘီလီယံကနေ ၈ ဘီလီယံအထိ ချမ်းသာပြီးသားသူပါ။

မယုံဘူးလား? မယုံရင် ထိုင်းတို့၊ အိန္ဒိယတို့မှာ ကျောက်ကပ်သွားရောင်းကြည့်လိုက်ပါ။ ထိုင်းမှာဆိုရင် မြန်မာငွေ သိန်း ၈၀၀ ခန့် (၈၀ မီလီယံအထိ ပေါက်ဈေးရှိနိုင်ပြီး) အိန္ဒိယမှာဆိုရင် သိန်း ၁၈၀ ခန့် (၁၈ မီလီယံ) ရရှိနိုင်တာကြောင့် သင့်ကို မီလီယံနာတစ်ယောက်လို့ ပြောရတာပါ။

တကယ့်ကို စိတ်မကောင်းစရာကတော့ ကျွန်တော်တို့ မြန်မာမိသားစုတွေထဲမှာ မိမိရဲ့ ကျောက်ကပ်ကို တကယ်ကြီး ထုတ်ရောင်းနေကြရပြီ ဖြစ်ပါတယ်။ ကျွန်တော်တို့ဘဝတွေ ဆင်းရဲတွင်းနက်နေတာ အဲ့ဒီလောက်တောင် ဖြစ်နေပါပြီ။ သင် သတိပြုမိရဲ့လား? အသွေးအသား ရောင်းစားတယ်ဆိုတာမှာ ကိုယ့်မြန်မာသမီးပျိုတွေ တိုင်းပြည်ဆင်းရဲမှုရဲ့ သားကောင်ဖြစ်ရပြီး တရားမဝင် မယားငယ်အဖြစ် လုပ်ကိုင်ရတာ၊ ပြည့်တန်ဆာအဖြစ် အသက်မွေးရတာတင် မဟုတ်တော့ပါဘူး။

တကယ့်ကို အသည်းတွေ၊ ကျောက်ကပ်တွေကို ထုတ်ရောင်းပြီး မိသားစုအတွက် အရိပ်တစ်ခုစာ၊ တပ်က သိမ်းသွားလို့ ပြန်ဝယ်ရတဲ့ လယ်မြေအတွက်၊ ဒါမှမဟုတ် စည်ပင်က အတင်းဖယ်ခိုင်းလို့ အိုးမဲ့အိမ်မဲ့ဘဝမှာ ပွဲစားနဲ့ချိတ်ပြီး ရင်ဘတ်ကို တကယ်ခွဲ၊ အသည်းနဲ့ ကျောက်ကပ်ကို ပေးဆပ်နေရတဲ့ ဘဝတွေ ဖြစ်နေပါပြီ။ ဒီကြားထဲ သားဖြစ်သူက တပ်ပြေးဖြစ်လို့ စစ်ထဲပြန်ပါသွားရတာ၊ စစ်ကြောင့် သေဆုံးရတာတွေ... ဒါတွေအားလုံးဟာ ဒီစစ်အုပ်စုရဲ့ အာဏာချုပ်ကိုင်လိုမှု တစ်ခုတည်းကြောင့် ဖြစ်နေရတာဆိုတာ ဘာနဲ့ သက်သေပြရပါဦးမလဲ? ပြောကြပါဦး။

ရင်နာလွန်းလို့ မျက်ရည်ကျပြီး ပြောပါရစေ... 'ငါတို့ဟာ မီလီယံနာတွေပါ'