အမှိုက်မှ ရွှေထုပ်၊ သူဌေးဖြစ်မယ်အဟုတ်

"အမှိုက်မှ ရွှေထုပ်၊ သူဌေးဖြစ်မယ်အဟုတ်"
========================

ကျွန်ုပ်တို့ တိုင်းပြည်သည် အင်မတန် ဆင်းရဲမွဲတေသော နိုင်ငံဖြစ်နေပြီ ဖြစ်သည်။ သူ့ကျွန်ဘဝမှ လွတ်မြောက်ခဲ့သော်လည်း ယခု မင်းအောင်လှိုင် လက်ထက်တွင် အခြားနိုင်ငံများသို့ သွားရောက်ကာ ကျွန်ခံရသည့် 'သဘောက်' ဘဝသို့ ပြန်လည် ရောက်ရှိနေရသည်။ ဤကဲ့သို့သော အကျပ်အတည်းကာလတွင် ကျွန်တော်ကတော့ လက်တွေ့မကျသည့် သဘာဝပတ်ဝန်းကျင် ထိန်းသိမ်းရေးဆိုင်ရာ ဟန်ဆောင်မှုများ၊ အနံ့ကြီး ဂွင်းကျယ် အထည်ကြီးပျက်ဉာဏ်နှင့် လူ့ကန့်လန့် အတွေးအခေါ်များကို ဘေးဖယ်ထားချင်ပါသည်။
လက်ရှိ ဘဝပေးအခြေအနေကို မှန်မှန်ကန်ကန် နားလည်ပြီး ကာလတစ်ခုအထိတော့ 'အမှိုက်ကောက်စားရသည့် ဘဝ' ကို ရဲရဲဝံ့ဝံ့ လက်ခံရမည်။ ၎င်းသည် ခိုးယူခြင်းမဟုတ်သလို ရှက်စရာလည်း မဟုတ်ပါ။ ကျွန်တော်၏ အဓိက ရည်မှန်းချက်မှာ တစ်ပါးနိုင်ငံတွင် ဒုက္ခရောက်နေသည့် မြန်မာများကို မိမိအိမ်သို့ ပြန်ခေါ်ချင်ခြင်း ဖြစ်သည်။ ထို့ကြောင့် ကျွန်တော်၏ စိတ်ကူးထဲမှ စီးပွားရေး ဗျူဟာတစ်ခုကို မျှဝေလိုပါသည်။
အမေရိကန်၊ ဂျပန်၊ ကိုရီးယား နှင့် ဥရောပနိုင်ငံများမှ စွန့်ပစ်လိုက်သည့် လျှပ်စစ်ပစ္စည်းဟောင်းများသာမက သက်တမ်းကုန် ကားဟောင်းများ (End-of-Life Vehicles - ELV) ကိုပါ ဝယ်ယူကာ ပြည်တွင်းရှိ Free Import and Re-export Zone (အခွန်လွတ် သွင်းကုန်နှင့် ပြန်လည်ပို့ကုန်ဇုန်) အတွင်းသို့ သယ်ယူခွင့် ပြုရပါမည်။
လုပ်ငန်းစဉ်အဆင့်ဆင့် ဖြည့်စွက်ချက်များ -
၁။ ကားဟောင်းဖျက်သိမ်းရေးနှင့် အပိုပစ္စည်းထုတ်လုပ်ခြင်း (Automotive Dismantling):
နိုင်ငံတကာမှ အသုံးပြုပြီးသား ကားဟောင်းများကို အလုံးလိုက် တင်သွင်းကာ စနစ်တကျ ဖျက်သိမ်းပါမည်။ ကောင်းမွန်သေးသော အပိုပစ္စည်းများ (Engine, Gearbox, Body Parts) ကို ပြန်လည်သန့်စင်ပြီး ပြည်တွင်း/ပြည်ပ ဈေးကွက်သို့ ပြန်လည်တင်ပို့ရောင်းချခြင်းဖြင့် ဝင်ငွေအမြောက်အမြား ရရှိနိုင်ပါသည်။
၂။ စနစ်ကျသော ခွဲခြားခြင်း (Industrial Dismantling): ကြီးမားသော ဂိုဒေါင်များအတွင်း လေးလံသော ပစ္စည်းများကို အလွယ်တကူ ရွှေ့ပြောင်းနိုင်သည့် Conveyor စားပွဲတန်းကြီးများဖြင့် စနစ်တကျ တပ်ဆင်ထားမည်။ အလုပ်သမားများက ထိုစားပွဲရှေ့တွင် တန်းစီကာ မိမိတို့ တာဝန်ယူထားသည့် အစိတ်အပိုင်းအလိုက် (ဥပမာ - ကွိုင်၊ စတီး၊ သံကျွတ်၊ ပလတ်စတစ်၊ လျှပ်စစ်ကြိုးနှင့် Circuit Board များ) ကို အမြန်နှုန်းဖြင့် ခွဲခြား ဖြုတ်ယူကြမည် ဖြစ်သည်။
၃။ ဈေးကွက်ချိတ်ဆက်မှု (Global Market Integration): ဤသို့ ခွဲခြားရရှိလာသော ကုန်ကြမ်းများကို ဝယ်ယူမည့် နိုင်ငံတကာ ဈေးကွက်ကြီးများ ရှိပြီးသား ဖြစ်သည်။ ပြည်တွင်း လုပ်ငန်းရှင်များကလည်း LC (Letter of Credit) ဖွင့်ကာ တရားဝင် ဝယ်ယူနိုင်မည် ဖြစ်သဖြင့် ပြည်တွင်း ကုန်ထုတ်လုပ်မှုအတွက် ကုန်ကြမ်းဈေးနှုန်းများ သိသိသာသာ ကျဆင်းသွားမည် ဖြစ်သည်။
၄။ ဘေးထွက်ဆိုးကျိုး စနစ်တကျ ကိုင်တွယ်ခြင်း (Hazardous Waste Management): အထူးသဖြင့် ဘက်ထရီအဟောင်းများနှင့် ကားဟောင်းများမှထွက်သော ဓာတ်ဆီ၊ ဆီဟောင်းများ ဖျက်ဆီးခြင်းသည် ပတ်ဝန်းကျင်ကို ထိခိုက်နိုင်သော်လည်း နိုင်ငံတော်အဆင့် နည်းပညာဖြင့် စနစ်တကျ လုပ်ဆောင်ပါက အင်မတန် အကျိုးအမြတ် များပါသည်။ ယခုအခါ ကမ္ဘာ့ဈေးကွက်တွင် ခဲ (Lead) သည် အလွန်ရှားပါးပြီး ဈေးကောင်းရနေသော ပစ္စည်းဖြစ်သည်။
၅။ စွန့်ပစ်တာယာမှ ဆောက်လုပ်ရေးပစ္စည်း (Upcycling): အသုံးမပြုတော့သော တာယာဟောင်းများကို တင်သွင်းကာ ပြန်လည် ထုတ်လုပ်ခြင်းဖြင့် အရည်အသွေးမြင့် ဆောက်လုပ်ရေးပစ္စည်းများကိုပါ ထုတ်လုပ်နိုင်မည် ဖြစ်သည်။
ဤ Free Import and Re-export Zone Project ကို အကောင်အထည်ဖော်ခြင်းဖြင့် သောင်းနှင့်ချီသော အလုပ်အကိုင် အခွင့်အလမ်းများ ရရှိလာမည်ဖြစ်ပြီး
"ခုန်ပျံရုန်းထ မြန်မာ့အနာဂတ်ဘဝ" ကို အတူတကွ တည်ဆောက်နိုင်မည် ဖြစ်သည်။
https://koagga.blogspot.com/.../turning-global-waste-into...
အောင်မျိုးလွင် ( အဂ္ဂ )
#JobCreationMyanmar #MyanmarInvestment #investmentopportunity #freetradezone #koagga