ကျွန်တော်နဲ့ မော်လွတ်

ကျွန်တော်နဲ့ မော်လွတ်

တစ်ချိန်က မင်္ဂလာတောင်ညွန့်မြို့နယ်၊ မြရာကုန်းလမ်း၊ တရုတ်သင်္ချိုင်းရှေ့ နှစ်ထပ်တိုက်နီကြီးမှာ "စစ်လ်စိလာ" (Silsila - အဆက်အနွယ်) အရ ခလီဖာဦးသန်းဝင်းဆိုသူမှ ဦးဆောင်ပြီး သူ၏နောက်လိုက် "မွရ်အစ်" (Murid) များနှင့် မော်လွတ်ဖတ်ပွဲတစ်ခု လုပ်ပါတယ်။

နောက်ဖေးမှာလည်း "ခီရ်" (Kheer) လို့ခေါ်တဲ့ ဆန်ပြုတ်ချို (နို့ထမင်း) ကို အိုးအကြီးကြီးဖြင့် ချက်ပြုတ်သူကလည်း ချက်ပြုတ်ပေါ့။ ထိုနေ့ မော်လွတ်ပွဲက လူသူအလွန်စည်ကားလှပါ၏။ အကြောင်းမှာ ဒူဘိုင်းမှ "ခလီဖာ အာရပ်စပ်" (Arab Saheb) တစ်ဦး ရန်ကုန်ရောက်လာချိန်၊ ထိုအာရပ်စပ်ကိုပါ ဖိတ်ခေါ်ထားသည့်အတွက် အာရပ်စပ် မမြင်ဖူးသူများ လာကြည့်ခြင်းကြောင့် ဖြစ်မည်ထင်ပါတယ်။

စာရေးသူ ကျွန်တော်ကလည်း ထိုအချိန်က လမ်း (၁၃၀) က ကျွန်တော့်အဖွားလေးအိမ်မှာ ခေတ္တနေခိုက် အာရပ်စပ်ကို အပြင်မှာ မမြင်ဖူးသည်က တစ်ကြောင်း၊ ထိုမော်လွတ်ပွဲတွင် ကျွေးသည့် ထမင်းပြုတ်ချို (ခီရ်) တွင် ရွှေလက်စွတ်ကွင်းများ ကံထိုက်သူရရန် ထည့်ပေးလေ့ရှိသည်က တစ်ကြောင်းကြောင့် ရောက်ရှိခဲ့ပါတယ်။

မော်လွတ်ဖတ်လို့ နောက်ဆုံးအပိုင်းတွင် ခလီဖာဦးသန်းဝင်းမှ "ဝဇီဖာ" (Wazifa) တစ်ပုဒ်ကို သူကိုယ်တိုင် ဖတ်သည်ကို သတိပြုမိပါတယ်။ ထိုသို့ မော်လွတ်ဖတ်ပြီးနောက် ကျွန်တော်လည်း အာရပ်စပ်ဘေးတွင် "ခီရ်" ဝင်ထိုင်စားနေချိန် ခလီဖာအာရပ်စပ်မှ ခလီဖာဦးသန်းဝင်းကို မေးပါတယ်။

"ခင်ဗျားဖတ်တဲ့ နောက်ဆုံးစာပိုဒ်က ဘယ်သူရေးပေးတာလဲ?"

ခလီဖာဦးသန်းဝင်းမှ "လွန်ခဲ့သည့် နှစ် ၃၀ ခန့်က ဆုံးသွားပြီဖြစ်တဲ့ ကျွန်တော့်ရဲ့ ဖခင် ခလီဖာစပ်ကြီးမှ ကျွန်တော့်အား ခလီဖာအဖြစ် ခန့်အပ်သည့် ဝဇီဖာလင်္ကာ ဖြစ်ကြောင်း" ပြောသည့်အခါ...

ခလီဖာအာရပ်စပ်မှ "ခင်ဗျား အိမ်နောက်ဖေးမှာ ဝါးရုံရှိတယ်မလား?" လို့ မေးလိုက်တော့ ဦးသန်းဝင်းနှင့် အနားရှိလူအများ မျက်လုံးပြူးသွားကြသည်။ အာရပ်စပ်မှ ဆက်ပြောသည်မှာ "အဲ့ဒီဝါးရုံထဲမှာ အဆစ်အကြီး ၃ ဆစ်ပါတဲ့ ဝါးငုတ်ရှိတယ်။ အဲ့ဒါကို ခင်ဗျားလက်နဲ့ ကိုယ်တိုင် သွားပိုင်းဖြတ်လိုက်..."

အာရပ်စပ်လည်း ဗမာပြည်မှပြန်၊ နောင်ကြားရသည်မှာ ထိုဝါးဆစ်ကို ခလီဖာဦးသန်းဝင်း ဓားမနဲ့ ပိုင်းဖြတ်ကြည့်ရာ ရွှေဒင်္ဂါးများစွာ ရရှိလိုက်သည်ဟု သိရပါတယ်။

ကျွန်တော်ကတော့ ကျွန်တော့်အမြင်နဲ့ သင်ခန်းစာတစ်ခု ယူလိုက်ပါတယ်။ "အာရဗီစာတွေ့တိုင်း ဝဇီဖာထင်ပြီး ဖတ်မနေပါနဲ့။ မိဘက သူရွှေထုပ်ထားခဲ့သည့်နေရာ ရေးထားခဲ့သည့်စာလည်း ဖြစ်နိုင်ပါတယ်။"

ဆိုလိုချင်တာက စာဖတ်ရင် အဓိပ္ပာယ်သိပြီးဖတ်မှ ပိုမိုအကျိုးထူးနိုင်ကြောင်းပါ။

အဂ္ဂ ( ကြံဖန်ရေး၊အသိတခုပေး )
الأَمْسُ لَيْسَ اليَوْمَ، وَاليَوْمُ لَيْسَ الأَمْسَ، وَذَلِكَ اليَوْمُ الَّذِي سَبَقَ الأَمْسَ لَيْسَ هُوَ الأَمْسَ. وَالأَمْسُ لَيْسَ هُوَ اليَوْمَ الَّذِي يَلِي الغَدَ.